Farmaziako fakultatea euskalduntzeko aldarrikapena aipatu genuen aurrekoan, oraingoan “Medikuntza euskaldundu!” ekimena aipatu behar dugu. Antza denez, osasungintza euskaraz ikastea ez da lan erraza! Hori dela eta, pasa den asteko kontzentrari jarraiki, aste honetan ITXIALDIA burutzen ari dira medikuntzako ikasleak. Hona hemen ekimen honetako kideek kontatutakoa:

Olatua zena uholde bilakatzen ari da, ikasle andana bildu baikara azken hilabeteotan Medikuntza euskaldundu! ekimenaren baitan gure fakultatean euskarak duen egoeraz arduraturik. Gaztelera hutsean ikasi behar dugu 2. ziklo osoa Txagorritxun eta 6. maila Gurutzetan. Eta, ez pentsa Basurto eta Donostiako ospitaleen kasua askoz onargarriagoa denik, ez, klaseen %31 besterik ez dugu euskaraz ikasterik lehenengoan, eta, %23a bigarrenean 4. mailan. Euskaraz gaixotzen garenok, baina, medikuntza euskaraz ulertuko duten pertsonak behar ditugulakoan gara Medikuntza euskaldundu! ekimeneko kideok.

“Gutun hau sinatzen dugunok, medikuntza euskaraz ikasiko genuelakoan matrikulatu ginen EHUn. 17 urte luze pasa dira lehen ikasleak euskaraz hasi zirenetik, eta egun, tamalez, ez dugu ikasketa guztiak euskaraz egiteko aukerarik. 17 urte ez, 28 urte pasa dira lehen klaseak euskaraz eman zirenetik guk egun erabiltzen ditugun ikasgeletan.

Intentzio ederrak eta itxaropena bor-bor, hainbatek agindu zuen fakultate honetako irakasgai denak euskaldunduak izango zirela 1994. urterako. 2. zikloko irakasgaien erdiak ere bai, antza. Helburu hura betetzea ez zen posible izan, ordea. Askok pentsatuko zuen ezinezkoa izan zitzaiela fakultate honetako arduradunei agindutakoa egi bihurtzea. Eskura zituzten baliabide guztiak erabiliak izan zirela zehazturiko helburuak betetzeko eta mendetan eremu akademikotik baztertua izan zen euskarari medikuntzan ere merezitako tokia egiteko.


Euskalduntze plan mordoxka egin da ordudanik, eta nekeza da balantzea positiboa dela esango duen inor topatzea. Denetariko trikimailuak darabiltza Euskal Herriko Unibertsitateak egoera zuritzeko: lanpostuak eskaini arren ez dela irakasle euskaldunik aurkezten, euskalduntzea poliki baina aurrera doala eta, zenbaitetan, datu ofizialak manipulatzen dituzte egoera hobea delako itxura ematearren.

Denetarik ikusiak gara, irakasgaiak euskarazko izenburua izanagatik gazteleraz izatea, praktika denak gazteleraz ematea, irakasgai bat euskaldundurik dagoela esatea klase gutxi batzuk euskaldunduak direlako eta abar luze bat. Urteak pasa arren, ez da 2. zikloan aurrerapauso nabarmenik eman, ospitaleetako irakasgaietan euskarak duen presentzia oso eskasa baita oraindik. Datu batzuk aipatzearren: Txagorritxuko ospitalean euskaraz ez da klase bat bera ere ematen, Gurutzetan 6. mailan ere ez, Basurton euskararen batez besteko presentzia %31koa da, Donostian 4. Mailan %23a dago euskaldundurik…

Egoera kezkagarri honen aurrean ematen duen erantzuna ikusita, EHUk guk euskaraz ikasteko egindako hautua betetzeko borondaterik ez duela argi geratu da, orain artekoan behintzat. Ezin aipatu gabe utzi egon badauden baliabideen erabilera eta ezagutza kaxkarra. 3. mailako ikasleek Anatomia Patologikoa ikasgaiko zenbait klase gazteleraz izan dituzte. Euskara Dekanoordearekin hitz egitera joandakoan, hara non esan ziguten bazeudela irakasle nahikoa irakasgai hori osorik euskaraz emateko. Antza denez, euskaraz eman beharrean, gazteleraz ematen zituzten klaseak irakasle hauek. Batek jakin zergatik.

Ikasleok arduraz ikusten genuen guzti hau, baita euskarazko matrikulazioaren jaitsiera ere. Fakultate honetara heldu ginenean, asko ez ginen jabetzen bigarren zikloan dagoen egoeraz. Kezka hau forma hartzen joan da, eta bertatik sortu da mugimendu hau, eskaera bakar baten inguruan: medikuntza euskaldundu dezatela behingoz. Gu ez gaude prestatuak hau noiz eta nola egin behar duten esateko, ezta baliabideak nola kudeatu behar diren esateko ere. Baina jakin badakigu euskaraz matrikulatu ginela unibertsitate honetan, euskaraz burutu nahi ditugula ikasketak eta EHU-k izan behar duela hautu horren bermatzaile. Euskaraz matrikulaturiko ikasle batek gazteleraz klase bat jasotzen duen aldiro bere eskubideak urratuak zaizkio, eta ez da onargarria.

Hitz polit eta hutsalak alboratzeko garaia da, osasun sistema euskalduntze bidean hezkuntzak izan behar duelako oinarri eta mugarri, EHUn euskalduntzeari modu serioan ekiteko ordua heldua da. Pentsaezina da osasun sistema euskaldun bat lortzea osasun arloko ikasketak euskaldundu gabe.

Guk, azken asteetan egin ditugun eta datozenetan egingo ditugun ekimen, hitzaldi, batzar eta itxialdiarekin prozesu honi beharrezko bultzada ematea dugu helburu, etorkizunean ametsa egia bihur dadin. Guztion artean lortuko dugu!”

Etiketak: Info

Iruzkin bat utzi


  • Artxiboa